!! يابري حالي كان صديت برياهـ !!

ماهـو بكفـو الوقـت حـبـك يمحـيّـه
ياللـي تخـاف صـروف الايـام تمحـاه
ارتـاح ..مـادام المـواصـل يقـوّيـه
انـت انت..وانـا انا..وقلبـي هـو ايـاه
حتـى ولـو بتغيـب ذكــراك تكفـيـه
ياواحـدٍ تكفـي عـن الـنـاس ذكــراه
حبـك علـى رملـة خفوقـي مواطـيـه
ورياح عذلني عنـك مـا تمسـح خطـاه
واللي يعـذل القلـب عـن درب غاليـه
الله بـمـا يـبـلا الموالـيـف يـبـلاه
اخفـيـه يابالفـيـت والـحـال يبـديـه
ادنـاة واحـد ينظـر الـحـال يـقـراه
مخفيـه فيه..ومعتـنـي ٍ به..وحامـيـه
مـن كـل عيـن ٍ ودهـا تنـزل حمـاه
قلـب ٍ يحبـك والهـوى الـذرب ماليـه
كانـك مكذبـنـي ؟؟ بعيـنـك تـحـلاه
شـرط ٍ تشوفـك فيـه منـت بحوالـيـه
ويمكن تشـوف ديـار واماكـن ارعـاه
وبتشـوف بـه تمثـال والوقـت هاريـه
وبتشـوف زرع ٍ ميـت وواقـفٍ مــاه
وبتشـوف جـرح ٍ فيـه سكيـن راعيـه
راح ونسـى السكيـن والجـرح ينـخـاه
وبتشوف حصـن ٍ عـج الاقـدار سافيـه
وبتشـوف باقـي بيـت راعيـه خــلاه
لا تنـزعـج هــذا خفوقي..وبـاقـيـه
ولا تضايـق مــن تِـصِـدِّع زوايــاه
قـد زلزلـه فرقـا وهـزت عـراويـه
والله ستـر والـحـظ عـانـه وعـافـاه
وكانه صلح لـك واعجبـك زيـد تِبَنيـه؟
ابـنـه وجـهـز للمقابـيـل مـبـنـاه
ابغيـك بـس مـن المـفـارق تـداريـه
(وازهل من يـداري شعـورك ويـدراه)
و(حلـل وحـرم) فيـه ياابـرك بلاويـه
وحلّه وراع رضاي..ورضاك.. ورضـاه
جعلك بعد بعض الوجيه..امحـق وجيـه!
نــاس ٍ مراتعـهـا الرفـيـق بتقـفـاه
انواع..واخطـر نـوع مانـي بناسـيـه
نـوع ٍ علـى تفريـق الاثنيـن مسـعـاه
تلـقـاه دوم..وكــل يــوم ٍ تلاقـيـه
والـى بغيتـه صـدق مـا عـاد تلقـاه
ولا انت ردك كل مـا ادعيك..((لبيـه))
انشهـد ان منتـوا بفـي عينـي اشـبـاه
منـت بمـع العالـم ولا تقـول لي..ليـه
انـت ادرى منـي وش جوابـي وفحـواه
كذيـه..ومـن الله يـازيــن والـيــه
واغـلا طـروش القلـب ودواه مـن داه
الحـلـم ياتيـنـي بزولـك..واراعـيـه
وفـي كـل حلـم اقـوم قبـل (اتحفـاه)
اعشـق سميـك فـي البزاريـن وادعيـه
واقبـل خطـاه إلـى اخـطـا واتلـقـاه
واسمـك يروعنـي إلـى مـر طـاريـه
واحـب ملقـوف ٍ يسـولـف وطــراه
وامـر بيتـك مـن بعيـد ٍ..ولا اجـيـه
وانـا لونـه فـي يـدي (مـا اتـعـداه)
حتـى (توايـر موتـري) تلتفـت فـيـه
تبغـي تلـف ويستحـي العقـل والجـاه
وصلـك يخيـط الصدر..والبعـد يفريـه
(ويابري حالـي كـان صديـت بريـاه)
ويلي على ادري حبنا ((ويـش تاليـه؟؟))
وويلي على ادري وش ورى الغيب ويلاه؟؟
عشـان اشـوف اذا محبتك..((ترفيـه))
والله لا اقـفـي عنّك..((استغـفـر الله))