منتديات مملكة الراقي - عرض مشاركة واحدة

#1 16-11-2020, 02:05 AM

حبيبي ما بقى عندي صبر يتحمل التأخير
رحلت وعقبك الدنيا غلاها طاح من عيني

تصدق وإلا ما تصدق أنا عاجز عن التفكير
تعال وشوف في عينك غيابك وش عمل فيني

أجاوب إللي يسألني عن أخباري وأقول بخير
وأنا ؟ لا خير بغيابك ولا حاجة تهنيني

على طاريك كل لحظة ولا أحتاج للتذكير
حريص القلب ما ينسى عيونك لا توصيني

محد يقدر يعوضني لأنك في عيوني غير
ومهما شفت أنا الفرحة بدونك ما تسليني

مثل شاعر عجز يوصف شعور وخانه التعبير
أنا ضايع ولا أدري من فراقك أنا ويني

مثل طير كسر بعدك جناجه وما قدرت آطير
أحاول أبتسم وأنسى ولكن وش ينسيني؟

أشوفك في صباحي أنت معنى يَ صباح الخير
واشوفك في مسائي حلم وردي لا تصحيني

تصدق السهر يرسم عيوني ويتقن التصوير
يشق النور في صفحة حياتي وما ألاقيني

أنام شلون ؟ ومشكلتي عجزت ألقى لها تدبير
طلبت النوم لحظاته وعييّا النوم يعطيني!

تغير وجهي من أول غيابك وابتدأ التأثير
حبيبي من التعب كافي خذيت اللي يكفيني

أنا ماقول اللي صار فيني ماهقيته يصير
لأني كنت متأكد بأن البعد ينهيني